LA LèTARE

Presseât,
come che al varà savût, CONVERGENZA PER IL FRIULI si presente a lis elezions provinciâls dai 9 e 10 Avrîl sustignint il candidât-president Giancarlo Tonutti. I domandi juste doi minûts par spiegâi lis resons e il sens di chest nestri impegn eletorâl.
Nô o vin ancjemò fiducie te inteligjence e tal lavôr dai furlans. O sin sigûrs che il Friûl al vebi lis risorsis morâls e materiâls par frontâ cun sucès lis sfidis dai timps, a tacâ de 'globalizazion'. No je nome une nestre percezion: i studis dal CENSIS a mostrin che la societât furlane e je une des plui ignovativis, culturâlmentri e sociâlmentri vivarosis, economichementri ferbintis. O sin une comunitât che e cjale indenant. O podaressin tignîsi in bon e olmâ l'avignî cun otimisim, ma purtrop il Friûl al è inserît tun contest, l'Italie, strac, fêr, in crise economiche e morâl. In chest contest lis potenzialitâts positivis dal Friûl no rivin a displeâ lis alis e cjapâ il svual.
Nô di CONVERGENZA PER IL FRIULI o pensin che, par dâ un avignî al Friûl, al coventi un mudament struturâl dal contest statâl. L'Italie e à di jessî de sô crise materiâl e morâl: chest al passe par un mudament di direzion politiche. Par chest o sustignin il centri-çampe, pûr jessint consapevui dai siei tancj limits e difiets. Ma chest nol baste. Al covente ancje che il Friûl al sei protagonist de gnove fase politiche. L'Italie e à di ripartî e in cheste gnove partence il Friûl al à di vê il pês e il rodul che i spiete. Un rodul so specific, che al puarti a plene floridure lis potenzialitâts de nestre societât. Chest resonament jal ai fat di persone a Romano Prodi.
Nô furlans o vin grandis responsabilitâts. O vin di jessi consapevui dai nestris interès, sielzi la nestre strade pal avignî, e percorile cun decision. O vin di pensâ un model di svilùp coerent cu lis atesis dal nestri popul, e savê dî di NO a cui che al ven a proponinus soluzions che no sein coerentis cui interès dal teritori. Esemplis di imposizions sbaliadis a'nd è tancj: i eletrodots in Cjargne e tes vâls dal Nadison, lis cassis di espansion sul Tiliment, e v.i. CONVERGENZA e à pretindût che la coalizion di centri-çampe e scrivès tal so program che no si fâs intervents avuâi cence il consens de int e dai Comuns. E à pretindût che al fos scrit che la Provincie e rispietarà lis peculiaritâts e i desideris di autoguviêr di ogni sô component teritoriâl (la Cjargne, la Basse il Cividalês e v. i.) metintsi al servizi des comunitâts dal Friûl.
Chest, in struc, il sens de nestre presince. Se Lui al ves di pensâ che lis nestris ideis a puedin jessi utilis al Friûl, Lu invidi a judânus tes formis che Lui al stimarà miôr.
Mandi e graziis denant trat

Sergio CECOTTI